CCXXIII.
LE CASTOR poursuivi du veneur alteré
S'arrache à belle dent ceste riche partie
Qui de son cors chastré à l'instant departie,
Le rend à l'avenir du chasseur asseuré.
Et nous dez que Sathan ennemi conjuré
Et le monde & l'instint de la chair pervertie
Espie, aguette, & suit nostre ame assujettie
Aux appetits lascifs du ceur immoderé :
Retrancherons nous point tant de pensers frivoles,
D'orgueil, d'ambitions, de convoitises folles,
Pour sauver de l'Enfer nostre esprit gemissant ?
Tousjours Sathan nous suit, & parmi les delices
De son miel destrempé aus appas de nos vices,
Va le fiel de la mort doucement se glissant.
CCXXIIII.
OR NOUS sommes de DIEU les enfans domestiques
Et non plus serviteurs, estrangers, ny forains,
Mais citoyens du Ciel avecque tous les Sains
Eslevez sur le plan des Prophetes anticques :
Dessus le fondement des loyx Evangelicques
Dont JESUS est la base, & la pierre des coins,
Auquel tous bastimens par ensemble conjoins
Vont croissant au Seigneur en temples magnifiques.
Chrestiens nous sommes tous ensemble edifiez
Tabernacles de DIEU, en luy vivifiez
Par l'esprit esclairé de sa sainte ordonnance
Tabernacles de DIEU tant que nous logerons
Nostre Sauveur en nous, de mourir n'esperons,
La mort n'habite point ou DIIEU fait demeurance.
