utilement des outils ; & d’avoir de la prudence, pour user comme il faut de celle d’autruy. La Sagesse elle-mesme est irresoluë & peu asseurée, quand elle manque d’approbation, & qu’elle est reduitte à son propre tesmoignage. Le raisonnement concerté ne nuit point à la premiere apprehension que nous avons de la verité des choses ; & nostre Aristote dit là dessus, que le sel ne fait point de mal au poisson de mer, & que l’huile assaisonne les olives. Le Courtisan estourdi & interessé, met toutes les affaires en desordre, & ruïne au lieu d’edifier : Mais le Ministre sage & fidele, qui divise egalement son affection, entre le Roy & l’Estat, rend de tres-grands services à l’un & à l’autre, & se peut dire, à mon avis, aveque raison, le temperament de la puissance d’un seul, & le bien commun de la Republique.
Mais mon opinion particuliere seroit peu de chose, & n’auroit pas assez de force, pour former & conclure ce Discours,
