luy rapporta ce qui luy estoit advenu et ce qu'elle avoit respondu. Quæritur[1] à laquelle des trois le pere devoit donner les deux cens escus. Vous y songerez, et ne sçay si vous serez point des miens, qui suis d'advis qu'elles devoyent toutes trois departir[2] les deux cens escus, ou bien en avoir chascune deux cens, propter mille rationes, quarum ego dicam tantum unam brevitatis causa : c'estoit que toutes trois estoyent de bonne volonté ; toute bonne volonté est reputée pour le faict : ergo in tantum[3] consequentia est in Barbara[4], ou ailleurs. Mais ce pendant, s'il ne vous desplaist, je vous feray une question à propos de ceste cy : « Lequel vous aymeriez mieulx estre, cocu en herbe, ou en gerbe ? » Et ne respondez pas trop tost, qu'il vault mieulx l'avoir esté en herbe, et ne l'estre point en gerbe : car vous sçavez combien c'est chose rare et de grand contentement que d'espouser une pucelle. Et bien, s'elle vous fait cocu apres, le plaisir vous demeure tousjours, je ne dis pas d'estre cocu, je dy de l'avoir despucelee. Et puis vous avez mille faveurs, mille avantages, à cause d'elle. Pantagruel[5] le dit bien ; mais je ne veulx pas en debatre les raisons d'une part et d'aultre, je vous en laisse le pensement à vostre loisir ; puis, vous m'en sçaurez à dire.
- ↑ Formule de philosophie scolastique, signifiant : on demande, on s'enquiert.
- ↑ Partager.
- ↑ Les premières éditions portent intratum, qui est évidemment une faute.
- ↑ Terme de logique que Des Periers fait semblant de prendre pour un titre d'ouvrage ou pour un nom d'auteur. C'est une imitation de Rabelais (livre I, ch. XIX), qui fait dire à Janotus, citant un texte de loi : « Il est in tertio primæ, en Darii ou ailleurs. »
- ↑ C'est-à-dire le Pantagruel de Rabelais, liv. III, ch. XXVIII, où Frère Jean dit à Panurge : « Si tu es coquu, ergo ta femme sera belle, ergo tu seras bien traité d'elle, ergo tu auras des amis beaucoup, ergo tu seras sauvé. »
