lequel vit encores, ayant perdu sa femme après avoir esté assez longuement avec elle, et s'estant assez bien trouvé d'elle, print envie de se marier en secondes nopces à une fille qui estoit belle et jeune, et de bon lieu ; non toutesfois qu'elle fust sa pareille en biens, et moins encores en autres choses, car il estoit desja plus de demy passé, et elle en la fleur de ses ans et gaillarde à l'advenant, tellement qu'il n'avoit pas le fouet pour mener ceste trompe[1]. Quand elle eut commencé à gouster un petit que c'estoit des joyes de ce monde, elle sentit que son mary ne la faisoit que mettre en appetit ; et, combien qu'il la traitast bien d'habillemens, de la bouche, de bonne chere, de visage et de parolles, toutesfois cela n'estoit que mettre le feu aupres des estoupes : si bien qu'il luy print fantasie d'emprunter d'ailleurs ce qu'elle n'avoit pas à son gré à la maison. Elle fait un amy auquel elle se tint pour quelque temps ; puis, ne se contentant de luy seul, en fit un autre, et puis un autre, de maniere qu'en peu de temps ilz se trouverent si bon nombre, qu'ilz nuisoyent les uns aux autres, entrans à heures deues et indues en la maison pour l'amour de la jeune femme, qui avoit desja mis à part la souvenance de son honneur pour entendre du tout[2] à ses plaisirs. Ce pendant que son mary ne s'en advisoit pas, ou paraventure si bien, mais il s'armoit de patience, songeant en luymesme qu'il falloit porter la penitence de la follie qu'il avoit faite d'avoir, sus le haut de son age, pris une fille si jeune d'ans. Ce train dura et continua tant, que ceux de la ville en tenoyent leurs comptes : dont les parens de luy se fascherent fort ; l'un desquelz ne se peut plus tenir, qu'il ne le luy vinst dire, luy remontrant la rumeur qui en estoit, et que, s'il n'y obvioyt, il donneroit à penser qu'il seroit de vil courage, et en fin qu'il seroit laissé de tous ses parens et des gens de sorte[3]. Quand il eut entendu ce propos, il fit semblant, devant celuy qui le luy tenoit, tel le cas le requeroit, c'est-à-dire d'un grand desplaisir et fascherie, et luy promit que il y mettroit ordre par tous les moyens à luy possibles. Mais quand il fut à part soy, il songea bien à ce qui en estoit : qu'il estoit hors de sa puissance
