de nettoyer si bien un tel affaire, que les taches n'en demeurassent tousjours ou long temps. Il pensoit que la femme se deust garder par un respect de la vertu et par crainte de son deshonneur ; autrement toutes les murailles de ce monde ne la sçauroyent tenir, qu'elle ne fist une fois des siennes. D'avantage, luy qui estoit homme de bon discours, raisonnoit en soymesmes, que l'honneur d'un homme tiendroit à bien peu de choses s'il despendoit du fait d'une femme[1]. Ce qui le gardoit d'apprehender[2] les matieres trop avant. Toutesfois, pour ne sembler estre nonchalant de son inconvenient domestique, lequel est estimé si deshonneste du commun des hommes, il s'avisa d'un moyen, lequel seul il pensoit estre expedient en tel cas. Ce fut, qu'il achepta une maison qui estoit joignante au derriere de la sienne, et des deux en fit une, disant qu'il vouloit s'accommoder d'une entrée et d'une issue par deux costez. Ce qui fut executé diligemment, et fut posé un huis de derriere le plus proprement qu'il se peut aviser. Duquel il fit faire demie douzaine de clefz, et n'oublia pas à faire faire une gallerie bien propice pour les allans et venans. Cela ainsi appresté, il choisit un jour de commodité pour inviter à disner les principaux parens de sa femme, sans toutesfois appeller ceux du costé de luy pour celle fois. Il les traita bien et à bonne chere. Quand ilz eurent disné, avant que personne se levast de table, il se print à leur dire ainsi en la presence de sa femme : « Messieurs et mes Dames, vous sçavez combien de temps il y ha que j'ay espousé vostre parente que voicy ; j'ay eu le loisir de congnoistre que ce n'estoit pas à moy à qui elle se devoit marier, d'autant que nous estions pas pareilz elle et moy. Toutesfois, quand ce qui est fait ne se peult deffaire, il fault aller jusques au bout. » Puis, en se tournant vers sa femme, luy dit : « Mamie, j'ay eu depuis peu de temps en çà des reproches de vostre gouvernement, lesquelles m'ont grandement despleu. Il m'ha esté dict que vous avez de jeunes gens qui viennent ceans à toutes heures du jour pour vous
