Page:Desperiers - Cymbalum mundi, Delahays, 1858.djvu/108

prestre, il suffit de sçavoir bien sa messe de Requiem^[1], de Beata^[2], et du S. Esprit, lesquelles tu auras assez tost aprises, quand tu seras de retour. Mais, pour parler au pape, je t'aprendray trois motz de latin si bien assiz, que, quand tu les auras dicts devant luy, il croira que tu sois le plus grand clerc du monde. » Mon homme fut tresaise et voulut sçavoir tout à l'heure ces trois motz. « Mon amy, ce luy dit l'autre, incontinent que tu seras devant le pape, tu te jetteras à genoulx, en lui disant : Salve, Sancte Pater. Puis il te demandera en latin : Unde es, tu ? c'est à dire : D'où estes vous ? Tu respondras : De Normania. Puis il te demandera : Ubi sunt litteræ tuæ ? Tu luy diras : In manica mea. Et incontinent, sans autre delay, il commandera que tu sois expedié^[3]. Puis tu t'en reviendras. » Mon Normand ne fut oncq si joyeulx, et demeura quinze ou vingt jours avec son homme, pour luy mettre ces trois mots de latin en la teste. Quand il pensa les bien sçavoir, il s'appresta pour prendre le chemin de Romme ; et, en allant, ne disoit aultre chose que son latin : Salve, Sancte Pater. De Normania. In manica mea. Mais je croy bien qu'il les dit et redit si souvent et de si grande affection, qu'il oublia le beau premier mot, Salve, Sancte Pater, et de malheur il estoit desja bien avant de son chemin. Si mon Normand fut fasché, il ne fault pas demander, car il ne sçavoit à quel sainct se vouer pour retrouver son mot, et pensoit bien que de se presenter au pape sans cela, c'estoit aller aux meures sans crochet^[4], et si ne cuidoit point qu'il fust possible de trouver homme si fidelle enseigneur et qui luy sceust si bien montrer, comme celuy de sa paroisse, qui le luy avoit appris. Jamais homme ne fut si marry, jusques à tant qu'un samedy matin il entra en une eglise de la ville où il estoit, attendant la grace de Dieu : là où il entendit que l'on commençoit la messe de Nostre-Dame en notte : Salve, sancta parens. Et mon Normand d'ouvrir l'oreille : « Eh Dieu soit loué et Nostre-Dame ! » dit il. Il fut si resjouy, qu'il luy sembloit estre revenu de mort à

1. Messe des morts.
2. Office de la Vierge.
3. C'est-à-dire : qu'on te délivre des lettres de prètrise à la chancellerie papale.
4. Expression proverbiale, signifiant : tenter une entreprise sans avoir pris toutes ses mesures pour réussir : car, si l'on veut cueillir des mûres sans les écraser, il faut d'abord attacher à l'arbre avec un crochet le panier dans lequel on les mettra.