Page:Desperiers - Cymbalum mundi, Delahays, 1858.djvu/115

La bibliothèque libre.
Le texte de cette page a été corrigé et est conforme au fac-similé.

et comme s'il luy eust voulu faire entendre qu'il faisoit beaucoup pour elle, et que ce ne fust qu'une corvée pour luy. Conclusion, elle se fist achever cest enfant : dont le sire André s'acquitta gentiment, non pas seullement pour ceste foys là, mais y retourna assez souvent depuis. Et, à l'une des fois, la jeune femme luy disoit : « Voire mais, si vous luy faictes quattre ou cinq oreilles, arriere[1] ce sera une mauvaise besoigne. — Non, non, ce dit le sire André, je n'en feray qu'une ; mais pensez vous qu'elle soit si tost faicte ? Vostre mary ha demeuré si long temps à faire ce qu'il y ha de faict ! Et puis on peult bien faire moins, mais on ne sçauroit en faire plus. Car quand une chose est achevée, il n'y fault plus rien. » En cest estat fut achevée ceste oreille. Quant le mary fut venu de dehors, sa femme luy dit la nuict en folatrant : « Ma figue[2] ! Vous estes un beau faiseur d'enfant ! Vous m'en aviez fait un qui n'eust eu qu'une oreille, et vous en estiez allé sans l'achever. — Allez, allez, dit il, que vous estes folle ! Les enfans se font ilz sans oreilles ? — Ouy dea, ilz s'y font, dit elle ; demandez le au sire André, qui m'ha dit qu'il en a veu plus de vingt qui n'en avoyent qu'une, par faulte de les avoir achevez, et que c'est la chose la plus malaisée à faire que l'oreille d'un enfant. Et s'il ne la m'eust achevée, pensez que j'eusse fait un bel enfant ! » Le mary ne fut pas trop content de ces nouvelles. « Quel achevement est cecy ? dit il. Qu'est ce qu'il vous ha fait pour l'achever ? — Le demandez vous ? dit elle. Il m'ha fait comme vous me faictes. — A ha ! dit le mary, est il vray ? M'en avez vous fait d'une telle ? » Et Dieu sçait de quel sommeil il dormit là dessus ! Et luy, qui estoit homme colere, en pensant à l'achevement de ceste oreille, donna par fantasie[3] plus de cent coups de dague à l'acheveur. Et luy dura la nuict plus de mil ans, qu'il n'estoit desja apres ses vengeances. Et, de faict la premiere chose qu'il fit, quand il fut levé, ce fut d'aller à ce sire André,

  1. ↑ En plus, au delà de ce qu'il en faut ; idiotisme usité alors dans le Lyonnais et la Bourgogne.
  2. ↑ Bien des femmes, pour éviter de dire ma foi en jurant, disent, les unes, ma fi ! les autres, ma figue ! et d'autres, ma figuette ! Figue ni figuette ne sont point une allusion à l'italien fica, comme le disent en raillant la Molza, dans son Capitolo delle fiche, et le Caro son commentateur, mais une simple extension du mot fi, dit au lieu de foi. (L.M.)
  3. ↑ Pour : fantaisie ; en italien fantasia.
Récupérée de « https://fr.wikisource.org/w/index.php?title=Page:Desperiers_-_Cymbalum_mundi,_Delahays,_1858.djvu/115&oldid=7875180 »