qui est la meilleure chose que puisse faire l'homme. Le plus gentil enseignement pour la vie, c'est bene vivere et lætari. L'un vous baillera pour ung grand notable[1], qu'il fault reprimer son courroux ; l'autre, peu parler ; l'autre, croyre conseil ; l'autre, estre sobre ; l'autre, faire des amis. Et bien, tout cela est bon ; mais vous avez beau estudier, vous n'en trouverez point de tel qu'est : Bien vivre et se resjouir. Une trop grande patience vous consume ; un taire[2] vous tient gehenné[3] ; un conseil vous trompe ; une diete vous desseiche ; un amy vous abandonne. Et, pour cela, vous faut-il desesperer ? Ne vault-il pas mieux se resjouir en attendant mieux, que se fascher d'une chose qui n'est pas en nostre puissance ? Voire mais, comment me resjouiray-je, si les occasions n'y sont ? direz-vous. Mon amy, accoustumez-vous-y ; prenez le temps comme il vient ; laissez passer les plus chargez ; ne vous chagrinez point d'une chose irremediable : cela ne fait que donner mal sur mal. Croyez-moy, et vous vous en trouverez bien : car j'ay bien esprouvé que pour cent francs de melancholie n'acquiterons-nous pas pour cent solz de debtes. Mais laissons là ces beaux enseignemens. Ventre d'ung petit poisson[4] ! rions. Et dequoy ? De la bouche, du nez, du menton, de la gorge, et de tous noz cinq sens de nature. Mais ce n'est rien, qui ne rit du cueur ; et, pour vous y aider, je vous donne ces plaisans Comptes ; et puis nous vous en songerons bien assez serieux, quand il sera temps[5]. Mais sçavez-vous quelz je les vous baille ? Je vous prometz que je n'y songe ny mal ny malice ; il n'y ha point de sens allegorique, mystique, fantastique. Vous n'aurez point de peine de demander comment s'entend cecy, comment s'entend cela ; il n'y fault ny vocabulaire ne commentaire : telz les voyez, telz les prenez. Ouvrez le livre : si ung compte ne vous plait, hay[6] à l'aultre ! Il y en ha de tous bois, de toutes tailles, de tous estocz, à tous pris et à toutes mesures, fors que pour plorer. Et ne me venez point demander quelle ordonnance j'ay tenue, car quel ordre faut-il garder
- ↑ Axiome, apophthegme ; notabilis.
- ↑ L'action de se taire, de garder le silence.
- ↑ Gêné, tourmenté.
- ↑ Parodie du juron : Ventre-Dieu !
- ↑ M. Louis Lacour voit ici une allusion au Cymbalum mumdi.
- ↑ Onomatopée dont se servent encore les charretiers pour exciter leurs chevaux. Hay ou haye ! signifie : Va, allons !
