temoigner le moindre dégoust : Il prenoit toutes les choſes quʼon luy ordonnoit pour sa santé sans aucune peine, quelque difficile qu’elles fussent, et lorsque je m’estonnois de ce quʼil ne temoignoit pas la moindre repugnance en le prenant, il se moquoit de moy, et me disoit quʼil ne pouvoit comprendre luy mesme, comment on pouvoit temoigner de la repugnance, quand on prenoit une medecine volontairement, et après qu’on avoit esté averty qu’elle estoit mauvaise, et qu’il n’y avoit que la violence ou la surprise qui dussent produire ses effects. C’est en cette maniere quʼil travailloit sans cesse à la mortification de ses sens.
Il avoit un amour si grand pour la pauvreté, qu’elle luy estoit toujourt presente ; de sorte que dés qu’il vouloit entreprendre quelque choſe, ou que quelqu’un luy demandoit conſeil, la premiere pensée qui luy venoit en l’esprit, c’estoit de voir si la pauvreté pouvoit estre pratiquée. une des choſes sur lesquelles il s’examinoit le plus, c’estoit sur cette fantaisie, de vouloir exceller en tout, comme de se servir en toutes choſes des meilleurs ouvriers &c et autres choſes
