Sa pureté nʼestoit pas mondre, et il avoit un si grand respect pour cette vertu, quʼil estoit continuellement en garde, pour empescher qu’elle ne fust blessée soit dans luy, soit dans les autres : et il nʼest pas croyable combien il estoit exact sur ce poinct, Jʼen estois mesme dans la contrainte ; car il trouvoit souvent à redire à des discours que Je faisois que je croyois fort innocens, dont il me faisoit voir ensuitte les defauts que je n’aurois jamais connus sans ses avis. Si je disois quelquefois par occasion que j’avois vû une belle femme, il se fâchoit, et me disoit quʼil ne falloit jamais tenir ces discours là devant des laquais, et des jeunes gens, parceque je ne sçavois pas quelles pensées je pouvois par là exciter en eux. Il ne pouvoit souffrir aussi les carresses que je recevois de mes enfans, et il me disoit quʼil falloit les en desaccoutumer, et que cela ne pouvoit que leur nuire, et que l’on pouvoit leur temoigner de la tendreſse en mille autres manieres. voilà les instructions quʼil me donnoit là dessus, et voilà quelle estoit sa vigilance pour la conservation de la pureté dans luy et dans les autres.
