y avoit fait venir pour aider à garder sa cité. En la cité a canonneries moult grandes et moult nobles ; et sont en une église on dit de Saint-Vist, et valent par an bien cinq mille florins. Cette marche de Narbonne est un des bons et des gras pays du monde, et quand les Anglois et les Gascons y vinrent ils le trouvèrent durement riche et plein. Voir est que ceux du bourg de Narbonne, avoient retrait en la cité leurs femmes et leurs enfans et partie de leur avoir, et encore en trouvèrent les Anglois et les Gascons assez. Quand les Anglois eurent conquis le bourg de
encloses et les ad arz et destruitz, hors pris certayns villes qu’il ad estably. Et puis il ala en la viscounté de Ryver et prist une bonne ville qu’au à noun Pleasaunce, q’est chief ville du païs, et l’ad arz et destruit et tut la païs environ. Et puis il alla en la countée d’Astryk et prist plusours villes, et gasty et destruit tut la païs. Et puis en la countée de Comenge, et prist illeosques plusiours villes et les fit ardre et détruire et tout la païs, et prist la chief ville q’ad à noun Seint Matan et est auxi graunde ville comme Norwiche. Et puis entra en le countée de Lille et prist graunt partie des villes encloses, et fist ardre et destruire plusours bonnes villes tresparses. Et puis entra en la seigneurie de Tholouse à là, et passâmes la ryver de Gerounde à une aure ryver, une leage amount Tholouse, q’est mult graunt ; qar nos enemys avoient debrusé toutz les pountz d’une partie Tholouse et d’autres, fors pris les pounts en Tholouse que la ryver va parmy la ville. Et le constable de Fraunce, le marschal de Clermound, le counte d’Erminake étoient od graunt poar en la dite ville à mesme le heure. Et la ville de Tholouse est moult graunt et forte et beale et bien enclose ; et il n’avoit nully en notre host qe unques savoit gué illesqes ; mais par là grâce de Dieux qe homme le trovast. Et puis il ala parmi la seigneurie de Tholousane et prist plusours bonnes villes encloses, et les ad ars et destruitz et tout la païs envyroun. Et puis entrasmes en la seigneurie de Karkasone, et plusours bonnes villes prismes avant que nous venismes à Carcasoun ; et prist la ville de Carcasoun q’est plus graunt, plus fort et plus beale qe Everwick ; et tut celle ville et toutz les altres villes et païs fusrent arz et destruitz. Et puis passasmes, et par plusours journées fusmes passez la païs de Carcasoun, et entrasmes en la seigneurie de Nerbone et prismes plusours villes et les gastames tanque nous venismes à Nerbone. Et la ville de Nerbone se teneit et fust gagné par force ; et la dite ville est poi meyndre de Loundres, et est sour la mear de Grece et y n’ad de la dite ville à la haute mear de Grece, qe deux petitz leages, et il y a port de mear et arivalle où les navires abordent aisément, dount la eawe vient à Nerbone, et Nerbone n’est qe quinze leages de Mountpelleres et dix-huit de Eguemort et trente de Avynon, Et vous please savoir que le Seint Piere maunda ses messagers à mounseir qe ne fusrent qe sept leages de luy ; et les messages maunderent un serjaunt d’armes qe fust serjaunt d’armes des huys de la chambre le Seint Piere od lour lettres à moinseir, em pryauntz qu’ilz purroient aver conduyt de venir à mounseir, mounstrantz a luy lour messages del Seint Piere, qe fust pour treter entre mounseir et sez adversaries de Fraunce. Et le dit messager estoit deux jours en l’ost avaunt qe mounseir luy volei véer ou rescevre ses lettres.
Et ceo fust l’encheison qe mounseir eust ne velx qe la poair de Fraunce estoit venuz hors de Tholouse d’encoste Carcasoun ; issint qe mounseir voudroit turner ariere sour eaux sodeignement ; et ensi fist. Et le tierce jour, quaunt nous deveroms avoir venir sour eaux, ils avoient novelx de nous devaunt le jour, et lour retreerent et disparirent devers les mountaygnes et les forées et alerent à graundes journées devers Tholouse. Et les gentz du païs qe fusrent lour guydes de lour amener cele chemyn partie de eux fusrent pris à lour retourner de eaux. Et pour ceo qe le serjaunt d’armes le Seint Piere fust en ma garde, jeo luy fice examyner les guydes qe fusrent ensi prises, qar le guyde q’il examyna fust le guyde le constable de Fraunce celle native ; et il purreit bien véer el counstre le contenaunce de les Fraunceis par l’examinement. Et jeo disoi al dit serjaunt q’il purroit bien dire à Seint Piere et à toutz les aultres de Avynoun ceo q’il avoit veu et oye. Et quaunt al respounse qe mounseir fist as messages, vous tiendrés bien paiés si vous seussez tout le manère ; qar il ne voleit soffrer en nul manère lez dits messages venir pluis près de lui, mais s’ils voudront treter q’ils maundassent au roy mounseir, et qe mounseir ne voleit rien feare si ne soit par comandement du roy ; mounseir ne voleit oyer nul tretée saunz soun maundement ; et del retourner mounseir après ses enemys, et del passage de Gerounde et de lez prises chastiels et villes en celle chemyn et d’autres choses q’il ad fait sour ses enemys en poursuaunt de eux, qe sount muilt beales et honourables, come plusours gentz entendount, en manere come mounseir Richarde de Stafforde et mounseir William de Burtoun saevrount pluis pleinement monstrer qe jeo ne vous puisse par letres maunder ; qar ceo seroit trop pour escrivere la manere. Et mounseir chivacha sour ies enemys huit semaygnes entiers et ne sojourna en toutz lieus forsqe onze jours. Et entenk in certain qe, pus qe caste guerre commencea devers le roy de Fraunce, y n’ont unqes tiel part en tiele destruccion come il ad eu à ceste chivaché ; qar la païs et les bones villes qe sount destruitz à ceste chivaché trova à roy de Fraunce pluis chescun an à maintenir sa guerre qe ne fist la moitié de son roialme, hors pris l’eschounge q’il fist chescun an de sa moneie et l’avantage et custume q’il prent du celle de Peyto, come jeo vous saveray monstrer par bone remembrance qe fusrent trovez en diverses villes en les hostès de resceivours ; qar Carcasoun, et Lémoignes q’est ausci graunt come Carcasoun, et deux aultres villes de costé Carcasoun troverount chescun an au roy de Fraunce les gages de mil hommes d’armes et oultre ceo C mil escutz veux pour maintener la guerre. Et entenk, par les remembraunces qe nous trovasmes, qe les villes en Tholousane qe sount destruitz et les villes en Carcasoun et la ville de Nerbone et de Nerbondoys troverent chescun an, ove la summe suisdite, en ayde de sa guerre, CCC mil escutz veux, come bourgeos de les graundes villes et autres gentz du païs, qe deveroient aver bone conissaunce, nous ount dist. Et par l’ayde de Dieux, si mounseir eust de qey de maintener ceste guerre et de feare le proffit du roy et soun honour, il enlargisseroit bien les marches et
