Et quant li rois qui l’amoit si,
Que riens fors que sa fille amoit,
Plorer et en genous le voit,
Si se leva apertement
Et le baisa moult doucement,
En disant : « Que vous fault, ma fille,
« Volés vous tous jours estre cille
« Qui se tenra a marier ?
« Dittes de quoi volés parler,
« Je vous orai tres volentiers. »
— « Monsigneur, il m’est bien mestiers
« Et que vous y soiiés pour mi,
« Car je n’ai ou monde aultre ami
« Que vous, ne nul je n’en desire. f. 15 a
« Et puis qu’il le me couvient dire,
« J’ai voé, puis .ii. ans en ça,
« Que ja mari mes corps n’ara,
« Quel qu’il soit, ne de quel arroi,
« Filz de duch, de conte ou de roy,
« S’il ne le vault, sans entredeus,
« Qu’il soit des aultres li plus preus. »
— « Li plus preus ! » li rois respondi.
— « Voires, monsigneur, ce vous di.
« Je ne l’arai par aultre voie ;
« Ançois en ce point demorroie
« Tout mon vivant. Nulz n’en parole. »
Dont reprist li rois la parolle
Et dist : « Ma belle fille, voir
« Ce seroit moult fort a savoir
« De trouver le plus preu qui soit ;
« Ne sai ou on le trouveroit.
« Et qui tout tel l’aroit trouvé,
« Que de grant proece esprouvé,
« Espoir, est il loiiés aillours.
« Dont, ma fille, c’est grans folours,
« Ce samble il, a mon couvenant,
Page:Froissart - Méliador, tome 1.djvu/135
Apparence
Le texte de cette page a été corrigé et est conforme au fac-similé.
55
Méliador