mengier et tiennent la teste basse et le regard bas. Et quant ils vont, ils lievent leurs piés haut et vont chancellant. Ceste rage ne se prent point ne à chiens, ne autres choses ; et muerent comme dessus est dit.
L’autre rage si s’apelle le rage endormie, pour ce qu’ils sont touzjours couchiés et font semblant de dormir et ainsi meurent sans mengier ; et aussi celle rage ne se prent point.
L’autre manière de rage s’appelle rage de teste, combien que toutes les rages soient de folie de teste et de chaleur de cuer, pour ce que la teste leur devient grosse et enflée, les yeuls gros et enflés ; et ne menjent point ; et ainsi muerent. Et ceste aussi ne se prent point. Et sachiez que nul chien qui soit enragié de l’une de cestes sept manières, de ma vie, je ne vi onques garir. Toute fois moult de gens cuident assés de fois que un chien soit enragié et si n’en est pas. Pour ce est la meilleure preuve que on puisse fere, trère le hors des autres chiens et l’essaier iij jours naturels ensuyvant sil vuelt mengier ne char ne autre chose. Et sil ne vuelt mengier dedans les trois jours tenez le pour enragié. Les remèdes qui sont à hommes ou à bestes qui sont mors[1] de chiens enragies convient qu’ils soient bien brief fetz ; quar s’ilz passent un jour naturel, je ne les oseroye emprendre à garir des deux rages que j’ay dit ; quar les autres ne portent nul mal et sont divers les remèdes. Les uns vont à la mer et ce est bien petit remède et font passer ix fois par dessus celuy qui en sera mors les ondes de la mer. Les autres ont un coq et le plument entour le cul et le pendent par les jambes et par les elles et mettent le treu du cul sur le pertuis de la morsure et aplanient au coc le col et les espaules afin que le cul du coq sucse le venin de la morsure et ainsi font longuement sur chescune des playes, et si elles sont trop petites, les font ouvrir à une lancette. Et dit len, mes je ne l’afferme mie, que se le chien estoit enragié que le coq enflera et mourra ; et celuy qui estoit mors garira. Et se le coq ne muert, c’est signe que le chien n’estoit point enragié.
- ↑ Mors, mordus.
