bien que le captal fust Anglois ; car il y avoit trèves entre le Roy de France et d’Angleterre. Si pouvoient être en leur route[1] environ soixante lances. Quand ils furent à Meaux en Brie, ils furent moult bien venus de ces dames et damoiselles.
» Ces Jacques et villains de Brie, qui entendirent qu’il y avoit à Meaux grand’foison de dames et damoiselles et de jeunes et gentils enfants, s’assemblèrent et avecques eulx ceux de Valois, et vindrent devant Meaux. Et d’autre part, ceux de Paris, qui savoient bien ceste assemblée, se partirent un jour de Paris par troupeaux et vindrent avec les autres, et furent bien neuf mille tous ensemble, et toujours leur venoient gens de divers chemins. Si vindrent jusques aux portes de la ville. Les gens de la ville ouvrirent les portes et les laissèrent entrer. Si entrèrent si grand’planté que toutes les rues en estoient pleines jusques au marché. Quant ces nobles dames qui estoient logées au marché de Meaux (qui est assez fort, mais qu’il soit gardé, car la rivière de Marne l’environne), virent si grande quantité de gens accourir sur elles, si furent moult ébahies ; mais ces deux seigneurs et leur route vindrent à la porte du marché qu’ils firent ouvrir, et se meirent au devant de ces villains (qui estoient mal armés), avec la bannière du comte de Foix et celle du duc d’Orléans et le pennon du captal de Buz. Quand ces méchantes gens veirent ces gens armés et bien appareillez pour garder le marché, si commencèrent les premiers à reculer et les gentilshommes à les poursuyvir, et à lancer sur eux de leurs lances et de leurs épées. Adonc ceux qui estoient devant et qui sentirent les horions, reculèrent de hideur, tous à un faix, et cheoient l’un sur l’autre. Lors issirent toutes manières de gens d’armes hors des barrières et gaignèrent tantost la place, et se boutèrent dedans ces méchantes gens. Si les abbatoient à monceaux et les tuoient ainsi
- ↑ Compagnie, escorte.
