mier an qu’ilz naissent, portent les boces, et au segont an, ilz gectent leurs testes et froyent et dès lors peuvent engendrer.
C’est bonne chasse que du cerf ; quar c’est belle chose bien quester un cerf ; et belle chose le destourner et belle chose le laissier courre, et belle chose le chassier, et belle chose le rechassier, et belle chose les abays soyent en yaue ou en terre ; et belle chose la cuyrée, et belle chose bien l’escorchier, et bien le deffère et lever les drois, et belle chose et bonne la venoyson. Et il est belle beste et duise, tant que regardant toutes choses, je tiens que c’est la plus noble chasse que l’en puisse chassier.
Ilz giètent leurs fumées en diverses manières selon les temps et selon les vianders qu’ils font ; ore en torche ; ore en plateaux ; ore fourmées ; ore aguillonnées ; ore entées ; ore pressées ; ore déboutées et en d’autres diverses manières, lesquelles je diray plus à plain quant je parleray comment le veneur les doit juger ; quar aucunes fois se mesjugent bien par leurs fumées, si font ilz par le pié. Et quant ilz giètent leurs fumées en plateaux c’est en avril ou en may jusques à mi juing ou ils ont viandé blés tendres ou herbes tendres ; quar encore n’ont ilz leurs fumées fourmées ; aussi n’ont ilz refete leur gresse ; mes j’ay veu assez de fois grant cerf et vieill et gras, et en droit cuer de sayson geter ses fumées en torche. Et pource et pour autres choses, y peut on bien estre engignié[1].
Des cerfz, les uns sont plus tost alans et mieulx fuyans que les autres, ainsi que sont les autres bestes et plus sachans et malicieux les uns que les autres, ainsi comme les hommes que li uns est plus sage que l’autre. Et ce leur vient de leur mère et de bonne engendreure et de bonne norreture, et de bonne naissance
- ↑ Engignié, trompé ; c’est le mot espagnol Engañar.
(Roman de la Rose, vers 4017.)
Nul ne la pourroit engignier ;
Ne pour parler, ne pour guignier,
Il n’est barat qu’elle ne congnoisse.
