péchiez et eschiner et vaincre toutes les pensées, temptations et delectations miserables, et especialement de opération, et eschiner les choses que tu defens de faire et server celles que tu commandes, toy servir, amer et honnourer.
Omnipotent Dieu et misericors pere et bon seigneur aye mercy de moi très-vil pécheur, donne moi sires sil te plait pardon de mes péchiez, et eschiner et vaincre toutes les pensées, temptations et delections mizerables, et especialement d’operation et eschiner les choses que tu defens de faire et server celles que tu commandes, toy servir amer et honnourer, compunction de humilité, discrete abstinence et mortification de la char, a toy prier et loer contempler et a tout fait et cogitation qui est selon toy pure et atemprée et dévote pensée, cognaissance de tes mandemens, dilection, delectation, tousiours sires les meilleurs euvres à proufiter senz deffaillir. Doulz sires ne me vueilles laisser a ma humainne ignorance ou enfermeté, ny a mes mérites ny a nul autre fors qua ta piteuse disposicion, maiz toy meismes ordonne moy piteusement et tous mes consiriers et euvres et paroles en ton plaisir, par quoy soit faite en moy, par moy et de moy tousiours ta sente voulenté, delivre moy doulx Dieu de tout mal, et me menne en ta saincte gloire. Amen.
XIX
Sire Dieu le mien créateur ie ay en toy espérance, fay moy sires leur de tous ceulz qui me poursuivent, et men delivre, car en toy ay toute mespérance, playse toy que ie ne soye confondus perdurablement, et en ta iustice me delivre et defent. Sire vray Dieu mon créateur et mon gouverneur ainsy que iay dit et tousiours diray, en toy est et a esté et sera mespérance, et tant que ie vive de ta misericorde ne me desparay, de moi meismes par certain quant ie regarde diligemment tous mes pechiez ie suy en desperation, car tousiours et mauvaises euvres et ordes iay commises maiz regardant le très doulz createur et mon souverain seigneur qui voist tousiours ma mauvaise vie, et encore à tent pouvoir si ie me corrigeray attendant souffrant et escoutant si en aucune manière ie vouldroye amander ma vie, ie regarde a la misericorde de Dieu mon createur qui si
