LI LIEVRE ENSEMB' MAN-TORTI
Ein zour maman Torti demande à Lièvr' faraud
Pour z'aut' parier ein cours' çà qu'arriv'ra plis tôt.
Lièvr' commenç' moque à li. –"Comment, mon gros commère,
"Vous' mazin' tout di bon va quitte à moi derrière!
"Mais vous la dépass' fou!…Vout' n'âm' vous va hallé,
"Comm' çarrett' di Géni' dans n'cimin di brilé.
Torti la r'poud : "Assez, 'stin' pas moi davantaze,
"Gros pied di bois là-bas va serve à nous bittaze.
"Lièvre y révir! Arranz' vous, pis q'vous y vé bitté,
"Tant mié pour moi…Bien sir, vous y s'ra dégoté.
L'a partis, man-torti hall' son gros carapace
Et li lièvre en misouk faire à li la grimace.
"Hall' li dit, gros commèr, hall' tout ton l'emplacement
"Comm' milets embourbés quand la rivièr' descend :
"Moi va març' à mon ais' ; quand qu'li trouve ein z'herbaze
Li mord' ein pé didans comm' pour fait badinaze.
Temps en temps sis son fess' li debout en fiçant
Comm' pour dire : "Man-torti, ah bon dié qu'vous l'est lent!
Pour moque encor' plis fort li dit dans n'son langaze :
"Gros commèr, moi n'a l'temps nettoyer mon visaze."
Avec son patt' di d'vant li gratter son miseau,
Comm' si va fair' son barb', ou comme ein vié zacquot.
Enfin pour mié fait voir tout son vantard cataque,
Li l'allonz' tout son long dans n'mitant la fataque.
