Droict au Bauldrier, & feit telle poincture,
Que la grand Boucle attachant la Ceincture,
Laquelle eſtoit d’or maſſif, fut percée :
Pareillement la Cuyraſſe faulſée,
Avec la lame, & ſi bien ſ’acrocha,
Que dans la chair du fort Gregeois toucha.
Dont toſt apres on veid yſſir le Sang.
Et tout ainſi que ſur l’yvoire blanc,
Souventeſfois les dames de Carie
Mettent la Pourpre, & font en Broderie
Pour les Chevaulx belles Rennes exquiſes,
Des Chevaliers tant aymées & quiſes :
Qui touteſfois ſont de ſi riche arroy,
Que c’eſt ung propre ornement pour ung Roy :
De tainct pareil, voire de plus beau luſtre
Fut lors la chair de ce Gregeois illuſtre,
Du ſang vermeil qui tout ſoubdain coula,
Et par la cuyſſe aux talons devala.
De ce dur coup, ſubit & violent,
Fut le grand Grec Agamemnon dolent,
Et le bleſſé ſouffrit grande douleur,
Voyant ſa playe, & changea de couleur.
Lors ſ’approcha ſon bon Frere germain,
En ſoupirant, & le print par la main.
Puis aſſiſtans la plus grand part des Grecs,
Piteuſement commencea ſes regretz.
Las (diſoit il) Ô ma ſeule eſperance
Mon Frere cher, fault il que l’aſſeurance,
Qu’on te donna aſſaillant le Troien,
Soit maintenant de ta mort le moyen ?
Te devoit on meurdrir couvertement,
Apres l’accord paſſé ſi ſainctement ?
Page:Homère - Les dix premiers livres de l’Iliade trad. Salel 1545.djvu/116
Cette page n’a pas encore été corrigée
![](http://upload.wikimedia.org/wikipedia/commons/thumb/d/d5/Hom%C3%A8re_-_Les_dix_premiers_livres_de_l%E2%80%99Iliade_trad._Salel_1545.djvu/page116-1024px-Hom%C3%A8re_-_Les_dix_premiers_livres_de_l%E2%80%99Iliade_trad._Salel_1545.djvu.jpg)