Page:Homère - Les dix premiers livres de l’Iliade trad. Salel 1545.djvu/147

    Encor par luy furent mortz abbatuz,
En meſme reng Thoon, avec Xanthus
Uniques Filz de Phenops perſonnage
Tres opulent : Mais qui par ſon vieil eage
Eſtoit privé d’aultres enfans avoir.
Or luy convint ſes grandz biens & Avoir
Laiſſer aillieurs, Choſequi eſt en ſomme
Dure à porter à ung Pere vieil homme.
    Diomedés paſſant oultre rencontre
Vng chariot luy venant à l’encontre eſtoient
Preux & vaillantz, leſquelz bien combatoient;
Dictz Echemon & Chromyus, qui furent
Occiz par luy, & bas en terre cheurent.
Car tout ainſi que le Lion ſuperbe
Tres affamé vient trouver deſſus l’herbe,
Quelle troupeau de Beufz, deſquelz ſ’efforce
En tirer ung hors de la troupe à force,
Et luy mectant ſa griffe dure & forte
Deſſus le Col, il le trayne ou l’emporte.
Ne plus ne moins le Gregeois hazardeux,
Vint à les joindre, & les tira tous deux
Du Chariot, & de leur ſang ſouilla
La forte main : Apres les deſpouilla :
Puis le harnois & Chevaulx feit conduire
Par ſes amys en ſa Tente ou Navire.
    Quand Eneas veit Troiens mal menez
Si rudement, Bleſſez, Occiz, Traynez :
Tout par l’effort d’ung ſeul qui les fouloit,
Et diſſipoit tout ainſi qu’il vouloit :
Soubdain partit & ſe meit en la Preſſe,
Ou il la veit la plus forte & eſpeſſe :