Page:Homère - Les dix premiers livres de l’Iliade trad. Salel 1545.djvu/223

Encontre luy. Ceſte brave Demande
Eſtonnera les plus fortz de la Bande.
Leſquelz tirez en Admiration
De ſa Valeur, ſeront election
De l’ung d’entre eulx, pour venir au Combat
Voila comment finira le Débat.
    L’opinion d’Apollo fut trouvée
Bonne & Subtile, & ſoubdain approuvée.
Lors Helenus le Prudent & Diſcret,
Qui entendit en Eſprit leur Secret,
Vint à Hector, & d’ung langage humain
Luy dict ainſi. Ô cher Frere germain
Entens à moy, & ne prens à merveille,
Si maintenant je t’adviſe & Conſeille
Pour ton honeur : Car eſtant ton bon Frere
Ie ne le puis ny doibs aultrement faire.
Fay retirer les Troiens & Grégeois :
Et puis t’avance, & de ta haulte voix,
S’il y aura Grec, qui vueille entreprendre
Seul contre toy, leur Querele defendre :
Va hardiment, car par la Deſtinée
Ta mort n’eſt pas à ce jour aſſignée
Ie l’ay ainſi cognu des Dieux haultains,
Qui ſont touſjours en leurs conſeilz certains.
Hector à donc tout Reſjouy ſ’avance,
Et fort des Rencs, tenant ſa longue Lance
Par le mylieu, Si faict : tous retirer
Ses Eſquadrons, leur défendant tirer
Contre les Grecs : Leſquelz ſoubdain ſ’arreſtent,
Gardans leur ordre, & a l’ouyr ſ’appreſtent.
Agamemnon auſſy pour l’eſcouter,
Feit les Gregeois promptement arreſter.