Page:Homère - Les dix premiers livres de l’Iliade trad. Salel 1545.djvu/88

Pour apporter les deux Aigneaux, & faire
Venir Priam, approuver tout l’affaire.
Taltibius auſſy du mandement
D’Agamemnon, alla diligemment
Iuſques aux nefz, pour en la Compaignie
Porter L’aigneau de la Cerimonie.
    Durant cecy, Iris ſ’en deſcendit
Du hault Olympe, & bientoſt ſe rendit
En la Cité, pour compter ces nouvelles
De poinct en poinct à la Belle des belles.
La Forme print d’une ſa bien aimée
Et belle Seur Laodicés nommée,
Qu’Elicaon filz d’Antenor le ſaige
Entretenoit, par loyal mariage.
    Point ne trouva pour lors la Belle oyſive,
Mais en beſoigne à ouvrer ententive.
Elle faiſoit en ſa Chambre une piece
De haulte lice, ou les beaulx faictz de Grece,
Et des Troiens à figures polyes,
Eſtoient pourtraictz, leurs Courſes, leurs Saillies,
L’aſpre Combat, & Rencontre cruelle,
Que les deux Camps faiſoient pour l’amour d’elle.
    Sus lieue toy, viens avec moy Heleine
(Dit lors Iris) tu verras en la plaine,
Pres la Cité, choſe bien merveilleuſe.
Ceulx qui ſouloient en Guerre perilleuſe
De jour en jour, au danger ſ’expoſer,
Tu les verras à preſent repoſer :
Les ungs aſſis, les aultres appuyez
Sur leurs Eſcuz, du travail ennuyez
Menelaus pour finir ces diſcordz
Contre Paris, combatra corps à corps :