Cest dero per cosselh que fos la vila asiza,
E i feiro venir l’ost.
A l’intrat de setembre, cant fo passatz aost,
Asetzeron Moissac de totas partz mot tost.
Lo comte Baudoïs i fazia gran cost ;
Mota auca i manjet e mot capo en rost,
Aisi co m’o contè sos bailes el prebost.
Las gatas els engens atempren per mei l’ost.
Gran mercat i avia de vi en cela ost
E de l’autra vitalha.
Al seti de Moisac a soen gran batalha ;
Li rotier de laïns fan en l’ost gran trebalha :
Mot soen n’aucizion d’aicela vilanalha ;
Al comte Baudoï, si Jhesu Crist me valha,
Aucizon .I. donzel, c’anc ausberg ni ventalha
Nol pog gandir de mort, que dins per la coralha
No li messol cairel co per .I. sac de palha.
E lo coms de Montfort comanda c’om i alha
A la fusta portar que motz carpentiers talha ;
El vai ab lor garnitz, que tem c’om los asalha,
E tuit sei companhon.
