Page:Le Voyage des princes fortunez - Beroalde, 1610.pdf/258

221

fortunez. Entreprise II.

en brillant qui ſe trouue és ardoiſieres d’Angers, & l’a ſi bien approprié, qu’il ſemble que ceſte ſoudure ſoit d’or : En apres il fit poſer les portes, les feneſtres & chaſſis, dont l’eſtoffe eſtoit eleué entre les meilleures. Celà fait, il fit deſmolir la grande muraille exterieure, laquelle oſtee, parut le domicile Philoſophique, conſtruit ainſi que d’vne piece, & tant accomply & beau qu’il peut eſtre dit le miracle du monde, & vnique merueille des pays, où le Soleil s’ayme, en outre il y mit des meubles conuenables, & neceſſaires auec les propres ornemens. Apres que le Roy eut veu ceſte preuue d’induſtrie il preſuma que Sarmedoxe ayant d’vn lieu ſans ordre & ruyné, abominable & deteſtable fait vne place elegante & polie, deſirable & delectable, que facilement il pourroit informer vne ſubſtance ſuſceptible de toutes belles formes : Parquoy receuant l’ouurage qu’il approuua fort, il y eſtablit les Sages, & leur mit és mains ſes trois fils pour les inſtruire en pieté, doctrine, arts & prudence. Ce lieu fut par l’aduis des Sages, & conſentement du Roy nommé l’hermitage d’honneur, auquel tout ce qui eſt neceſſaire à vn lieu de plaiſir ſe trouue, ioinct que toutes honneſtes commoditez, auec infinies ſingularitez, y ont eſté aſſemblees tant par la liberalité du Roy, que par l’induſtrie des Sages, & rencontres qui s’y ſont addonnees, ſoit par le reſte des baſtimens qui y a eſté adiouſté, qu’aux appartenances que le Roy y a adiointes, auec iardins, boys, eſtangs, & clos qu’il y a faict tellement approprier, que l’ō peut eſtimer ce lieu entre les plus ſuperbes de