retour de ſes fils, leſquels auoyent entrepris vn voyage qui les retenoit encor, adiouſtant à ſon diſcours la grace dont les princes ſçauent gratifier, amuſer ou ſuſpendre les cœurs, ſelon que l’iſſue des affaires les contraindra. En meſme temps l’ambaſſadeur de l’Empereur de Glindicee fut ouy, lequel obtint auec grand ſigne de courtoiſie, ce qu’il vouloit, pour confirmation dequoy le Roy enuoya le Duc de Porictonie vers l’Empereur, luy offrir tout ce qui eſtoit en ſon pouuoir, & deuant que ces ambaſſadeurs partiſſent il fit venir Sarmedoxe auquel il enioignit que l’hermitage fut ſumptueuſement accōmodé, & que tout y fut d’ordre pour y receuoir des Princes de telle qualité. L’empereur qui n’attendoit que le retour du Prince de Glacere, eſtoit preſt à partir, que le voicy arriuer accompagné de belle nobleſſe de pluſieurs prouinces, & honoré du grand Duc de Porictonie, lequel ſe preſenta à l’Empereur qui auoit eſté auerti du merite de ceſt ambaſſadeur lequel fut dignemēt receu, rafraiſchi & traicté, en toute magnificēce. Iour d’audience luy ayant eſté donné, il fut introduit deuāt l’Empereur pres de la majeſté duquel eſtant en ſon deuoir il deduit en belles paroles & ſuccintes la cauſe de ſa legation, & ſelon ce qui luy eſtoit commandé aſſeura le monarque de la bonne volonté du Roy de Nabadonce ſon maiſtre, à quoy il reçeut reſponce aggreable oyant ſortir de la bouche de ceſte Empereur les beaux & ſages diſcours qui le contenterent tant qu’il a plus faict eſtat de ſon belle eſprit que des magnihcences de ſa court, bien qu’elles fuſſent
