Belles pointes d'amour. Reuers contre les ames qui deſpriſent les belles promptitudes. Amours galans de Voſolint & de la petite Floride. Traict ſur le ſujet d'vn miroir. Paſſions amoureuſes ſur le ſuiet d'vn crayon.
A lieſſe eſtoit fortifiee en l'hermitage, tant à cauſe des belles auantures qui ſ'y acheuoyent que pour la ioye que l'Empereur en receuoit, laquelle ſe meſloit tellement és eſprits de tous, que la pure lieſſe en treſſailloit. En ceſte commune alegreſſe le iour eſtant reuenu ce Monarque fut conduit au quatrieſme palais, qui eſtoit natté partout, & luy & ſes gens par l'ordre que les Princes y auoyent continuee, veſtu de draps de couleur de iaune paillé ſelon la couleur attribuee à Iupiter. L'Empereur aſſis & les amans appellez, voicy vn qui ſe preſenta aſſez hagardement, & dit, Sire, voila vne belle que ie vous prie de iuger ſelon voſtre equité, à ce qu'elle reſſente le mal qu'elle m'a fait ſouffrir en la ſeruant. Acheuant ceſte parole la muſique preſte, ſouſpira auec l'épinette, l'ær que cét amant auoit le premier aſſemblé pour proteſter de ſon amour à ſa Dame.
Il eſt vray, c'eſt Amour qui force mon courage,
Ie forcene apres l'ar de vos perfections :
