ques autres petites apparences de l’ombre d’iceluy vn peu eſlongnees. L’Ambassadeur. En vn meſme temps par vne meſme cauſe, en vn meſme ſuiect, excitez trois effects tous differents & apparents. Gifeol ſe ſouriant dit, Les grands ſecrets ſont les plus aiſez, & les diſcours magnifiques couurent de petites choſes, puis il fit oſter le flambeau & ouurit les feneſtres. Auſſitoſt (car il auoit tout diſpoſé) l’Eſchançon entra auec les autres ſeruants ſuiuant le grand Maiſtre, le petit couuert fut dreſſé, & le bouillon de la Royne fut apporté & mis ſur la table. Gifeol dict à l’Ambaſſadeur : Ce boüillon eſt trop chaud, il faut le refroidir, adonc il verſa de l’eau froide dedans comme enuiron autant qu’eſtoit le tiers de ce que le plat contenoit, puis il dit : En meſme temps, qui eſt ores par meſme cauſe, qui eſt ceſte eauë de fontaine, en meſme ſuject qui eſt ce boüillon, ie fais quatre effects differens & apparens. Car le boüillon eſt refroidy, il eſt deſſalé, il eſt deſgreſſé, & multiplié. Ie croy que vous deuez eſtre contant de ces demonſtrations : & ſi iamais ie me trouue deuant voſtre Royne pour le ſujet qu’elle entend touchant la derniere doute, ie ſçay le moyen de luy en donner l’apparence de merite, mais ceſtecy ſuffit, iuſques à ce que ſ’il eſt beſoin ie vous face voir l’eau deſechee, coulouree, fixee, & enrichie. Et ſçachez par là, que ie peux vous contenter amplement à l’honneur de ma Royne, Cecy acheué Lidoce remercia la Royne,
