mon Seigneur, de qui mon mary a touſiours eſté ſuiet, & loyal vaſſal, que vous me vueilliez ayder & ſecourir en mon aduerſité, à quoy vous m’auez promis en public, de ne manquer en la preſence de pluſieurs nobles perſonnes : & cependant ie voy maintenant qu’au lieu d’effectuer la promeſſe que vous m’auez tant de fois repetée, & de vous en acquiter, vous alleguez pour excuſe que vous en auez eſcrit au Vice-Roy, & n’ayant de beſoin de tant de forces, que vous dites que l’on m’enuoyera pour cét effet, pource qu’auec cent hommes, & les miens qui ſont fugitifs par le pays en attendant mon retour, ie me fais forte, bien que ie ne ſois qu’vne femme, qu’en moins d’vn mois ie reprendray tout mon pays, & vangeray la mort de mon mary, qui eſt ce que ie deſire le plus, eſtant aidée de Dieu Tout-puiſſant, de la part duquel ie vous prie & requiers pour le ſeruice & l’honneur du Sereniſſime Roy de Portugal mon Maiſtre, ſeul azile aſſeuré de mon vefuage, que puiſque vous le pouuez, vous le faßiez promptement, pource qu’en la diligence conſiſte ce qu’il y a de plus important en cette affaire, & le faiſant ainſi vous coupperez le chemin à l’intention de cét ennemy, qui ne tend qu’à la ruine de ceſte fortereſſe, comme vous pouuez reconnoiſtre par les moyens qu’il a procurez pour ce faire. Si vous deſirez de m’enuoyer le ſecours que ie vous demande, ie l’attendray icy volontiers, ſinon eſclairciſſez-m’en, pource que vous me nuiſez autant en me faiſant perdre le temps, comme vous m’apporteriez de dommage, ſi vous me refuſiez ce que ie vous ay demandé auec tant d’ardeur, & que vous eſtes obligé de faire en qualité de Chreſtien, comme le ſçait fort bien le Seigneur Tout-puiſſant du Ciel & de la terre, lequel ie prends à teſmoing en cette mienne requeſte.
edro de Faria ayant oüy cette deſolée Reyne, luy diſoit publiquement en luy remettant en memoire les obligations qu’il auoit de faire ce qu’elle luy demandoit ; vaincu par ſa propre oubliance, & preſque hon-
