Page:Les voyages advantureux de Fernand Mendez Pinto.djvu/311

293

de Fernand Mendez Pinto.

bien eſtonnez de noſtre affliction, & de ne deſcouurir perſonne en ce lieu. Mais vn peu apres nous viſmes venir à nous vn jeune homme aagé de ſeize à dix-ſept ans, monté ſur vn bon cheual, & accompagné de quatre hommes de pied, dont l’vn portoit deux lievres, & l’autre cinq Niuatores, oyſeaux qui reſſemblẽt à des faizans, enſemble vn Autour ſur le poing, & tout à l’entour vne meute de ſix ou ſept chiens. Ce ieune Gentil homme eſtant pres de nous arreſta ſon cheual pour nous demander qui nous eſtions, & ſi nous voulions quelque choſe ? A cette demande nous reſpondiſmes le mieux que nous pûmes, & luy fiſmes vn ample recit de tout l’euenement de noſtre naufrage ; dequoy il teſmoigna eſtre fort fâché par les ſignes exterieurs que nous remarquaſmes en luy. Là deſſus deuant que paſſer outre, Attendez-là, nous dit-il, car tout maintenant ie vous feray donner ce dequoy vous auez beſoin, & le tout pour l’amour de celuy qui auec vne gloire des grandes richeſſes vit regnant au plus haut de tous les Cieux. Vn peu apres il nous enuoya querir par vne vieille femme, qui eſtoit veſtuë d’vn habillement fort long, auec vn chappelet pendu au col, à a façon de celles que nous auons accouſtumé d’appeller deuotes. Cette bonne Dame nous ayant abordez, Le fils de celuy, nous dit-elle, que nous tenons ceans pour maiſtre, & de qui nous mangeons le riz, vous enuoye appeller. Venez donc apres moy en toute humilité, afin qu’il ne ſemble à ceux qui vous verront que vous ſoyez des faineans, qui mendiez pour vous exempter de gagner voſtre vie par le trauail de vos mains. Cela dit, nous entraſmes auec elle dans vne autre baſſe court beaucoup plus belle que cette premiere, enuironnée de deux galleries comme ſi c’euſt eſté quelque Cloiſtre de Religieux, où ſe voyoiẽt peintes pluſieurs femmes à cheual allans à la chaſſe auec des oyſeaux ſur le poing. Au frontiſpice de cette court, du coſté de l’eſcalier par où l’on montoit, il y auoit vne grande arcade ouuragée de graueures fort riches, & au milieu eſtoit ſuſpendu vn Eſcuſſon d’armes en façon de pauois, attaché à vne chaiſne d’argent. Au dedans eſtoit peint vn homme preſque fait en forme de Tortuë, ayant les pieds en haut &