nerent viſage, & ſe deffendirent courageuſement, puis lors qu’ils furent meſlez enſemble, les vns pour entrer, & les autres pour deffendre l’entrée, ceux d’Achem mirent le feu à vne grande mine qu’ils auoient faite, qui pour eſtre de pierres ſeiches, eut vn tel effet, qu’elle ietta en l’air le Capitaine des Batas, & plus de trois cens hommes des ſiens, qui furent tous mis en pieces, auec vn ſi grand bruit, & vne ſi eſpaiſſe fumée, que ce lieu ſembloit eſtre le naturel portraict de l’enfer. Cependant les ennemis firent vn grand cry, & voyla qu’en meſme temps le Roy d’Achem ſortit en perſonne, accompagné de cinq mille ſoldats, tous hommes determinez, & qui ſans reconnoiſtre chargerent les Batas auec furie. Et pource que ny les vns, ny les autres ne pouuoient s’entreuoir à cauſe de la fumée de ceſte mine, il ſe fiſt entr’eux vne batterie ſi confuſe & ſi cruelle, que pour en dire le vray, ie ne puis raconter comme le tout ſe paſſa. C’eſt pourquoy il me ſuffira de dire qu’en l’eſpace d’vn quart d’heure que dura ce combat, il demeura ſur la place plus de quatre mille hommes des deux coſtez, deſquels le Roy des Batas perdit la meilleure partie : cela luy donna ſuiet de ſe retirer auec ce qui luy reſta de gens en vn roc que l’on appelloit Minacaleu, où prenant le ſoin de faire penſer les bleſſez, il ſe treuua qu’il y en auoit plus de deux mille de nombre, ſans y comprendre les morts, qui pour ne pouuoir eſtre enſeuelis ſi ſoudainement, furent expoſez au courant de la riuiere.
Ainſi par l’éuenement de cette meſlée les deux Roys ſe tinrent en paix quatre iours durant, à la fin deſquels vn matin comme on ne penſoit à rien moins, l’on viſt paroiſtre au milieu de la riuiere du coſté de Penatican, vne flotte de quatre-vingts ſix voiles, auec vn grand bruit de muſique & d’allegreſſe, où ſe remarquoient auſſi pluſieurs eſtendarts, & bannieres de ſoye. D’abord cét obiect eſtonna grandement les Batas, pour ne ſçauoir ce que c’eſtoit. Toutesfois ceſte meſme nuict leurs eſpions prirent cinq peſcheurs, leſquels mis à la gehenne, confeſſerent que c’eſtoit l’armée que le Roy d’Achem auoit depuis deux mois enuoyée à Teuaſſery, pource qu’il auoit guerre auec le Sornau, Roy de Ciam, &
