Com fait la mort qui riens ne prise ;[1]
Car puis que j′ay pris mon prison,
Je le met dedens ma prison
Qui est appellée joieuse ;
Delitable est et gracieuse.[2]
La aprent il sans mespresure
De tous biens la bonne apresure,[3]
Et la parfaite congnoissance
D′onneur et de toute vaillance.
Car je le met en la maistrie[4]
De Science qui le maistrie ;[5]
Cremour et Honte de meffaire[6]
Et Congnoissance, a lui parfaire,
Sont ordené et establi.
Ces quatre vertus en oubli
Ne sont pas pour lui detrier.[7]
Et encor, pour lui affermer,
Met j′en son cuer un desirier[8]
Qui d′onneur le met en sentier,
Et une volenté jolie[9]
Qui tousjours le semont et prie
Qu′il soit jolis et pleins de joie.
Biaus dous amis, que te diroie ?[10]
Einsi les prisons que je preng[11]
En joie et en solas maintieng
Et les fais a honneur venir ;
Mais la mort prent sans revenir.[12]
Or t′ay je dit, se Dieus me gart.[13]
De ma puissance une grant part.
Mais encor te diray je plus,