assuré chez luy. Le lundy matin, la furie recommenceant, son hoste le vint prier de se retirer, disant qu’il ne le pourroit sauver et cependant qu’il seroit cause de sa ruyne, qu’il n’eust pas plaint sy elle l’eust peu guarantir ; déjà les meurtriers estoient chez le plus proche voisin nommé Odet Petit, libraire, qu’ilz tuèrent et jettèrent mort par les fenestres. Il prend donc ung habillement noir fort simple et son espée, et sort tandis qu’ilz estoient occuppés au sac de la maison voisine, et de là passe jusques à la rue St Martin, et entre en une petite ruelle dicte de Trousse vache, chés ung huissier nommé Girard qui faisoit les affaires de leur maison. Le chemin étoit long et ne passa sans plusieurs mauvaises rencontres. Il trouva l’huissier à sa porte qui fit bonne contenance et assez à propos, car le capitaine du guet passoit à cest instant, et luy promit le dit huissier de le mettre le lendemain dehors. Il se met à escrire come ses autres clercs ; le mal fut que ses gens, que touteffois il n’avoit avertis du lieu de sa retraicte, s’en doubtèrent et l’y vinrent trouver l’ung après l’aultre, et furent remarqués entrer là dedans, qui fut cause que le capitaine du quartier manda la nuict l’huyssier et luy commanda de mettre en ses mains celuy qu’il avoit chez luy. L’huyssier s’en estonna et, de grand matin, le vient prier d’en sortir, dont il se résolut, quelque danger qu’il vist, qui fut le mardy matin, laissant là le sr Raminy qui avoit esté son précepteur, lequel fit doubte de sortir avec luy pour n’estre en danger l’ung pour l’autre. Comme il descendoit tout seul, (car l’huyssier ne vouloit plus ouïr parler de le tirer en sa compaignie hors de la
