par conſequent en meſme temps & Clelie, & Lucrece ; qui parle d’enleuer la Perſonne que i’aime pour luy ſauuer la vie ; & qui ſans doute ne me la rendroit pas s’il l’auoit enleuée. Mais auſſi ſi ie vay me mettre entre les mains de Tarquin, ie deuiens ſon Priſonnier, & celuy du Roy mon Pere tout à la fois : & ie ne ſeray peut-eſtre que le ſpectateur inutile des ſupplices que le Tyran voudra faire ſouffrir à Clelie, ſans auoir ſeulement la liberté de pouuoir mourir. D’autre part ie viens de laiſſer eſchaper vn Riual, qui a mille intelligences dans Rome : ie viens d’en preſenter vn autre au Prince Sextus, qui peut ſe rendre conſiderable à Tarquin par diuers intereſts : de ſorte que ſi ie ſuis Priſonnier on fera mille choſes contre moy, & à la Ville, & au Camp, où ie ne pourray m’oppoſer. Mais
