mieux, par ce que luy dit cét illuſtre Romain : car apres qu’Herminius eut fait vn compliment adroit pour commencer cette entre-veuë ; que Valerius eut fait le ſien en particulier; & qu’Aronce eut parlé à tous les trois auec ſon eſprit & ſa bonne grace ordinaire, Brutus prenant la parole ; vous voyez illuſtre Prince, dit-il, iuſques où s’eſtend la tirannie de l’iniuſte Tarquin, puis que pour conſeruer ma vie, il a fallu perdre ma raiſon, ou la cacher du moins ſi bien qu’il n’en ait eu aucune connoiſſance. Mais de grace, adiouſta-t-il, ne me croyez pas capable d’auoir ſongé ſeulement à eſuiter la mort par vne ſi bizarre voye : car ſi ma feinte ſtupidité n’auoit pas vne plus noble cauſe, ie me croirois indigne d’eſtre connu de vous. Cependant comme ie ne puis preſentement vous dire le deſtail de
