à Herminius qu’il falloit donc qu’il obligeaſt Zenocrate à aller à Cluſium, parce qu’il eſtoit fort connu & fort eſtimé de la Princeſſe des Leontins, qui auoit beaucoup de credit, & beaucoup d’adreſſe : qu’il falloit qu’il le chargeaſt d’une Lettre pour elle, & d’une pour la Reine Galerite ſa Mere, & qu’il enuoyaſt Celere vers le Roy, aupres de qui il auoit eſté aſſez long-temps dans ſa premiere ieuneſſe, pour pouuoir eſperer d’eſtre creu lors qu’il luy parleroit de la part d’Aronce. Car encore que ſa Cour euſt autrefois ſeruy d’Azile à Porſenna, comme il ne s’agiſſoit pas de ſes intereſts au Siege d’Ardée, il n’eſtoit pas impoſſible de luy perſuader qu’il luy importoit que Rome ne deuinſt pas ſi puiſſante qu’elle ſe viſt en eſtat de pouuoir opprimer tous ſes voiſins. Ioint que pour faire la choſe auec plus de raiſon, Herminius s’en-
