dans l’eſprit eſt bien ou mal fondé. Cependant puis que vous le voulez, il vaut mieux que vous ſoyez iuges de mes penſées, que ſi ie me meſlois d’en iuger ſans vous. Sçachez donc que i’examinois dans mon eſprit, s’il n’eſtoit point à craindre que les diuers intereſts que nous auons tous de deſtruire la puiſſance de Tarquin, ne nous perſuadaſſent qu’il n’y auoit nul ſcrupule à faire, d’entreprendre de changer la face du Gouuernement : car ſi vous me demandez mes veritables ſentimens, ie vous diray que ſi Tarquin auoit eſté eſleu legitimement, ie ne ſongerois iamais à le chaſſer de Rome, quoy qu’il m’en ait exilé, quoy qu’il ait deſtruit ma Maiſon, & quoy qu’il ſoit le plus iniuſte Prince du monde. Ie croy que nous deuons reſpecter les Dieux en la perſonne de ceux qui ont vne puiſſance legitime, & ſouffrir leur domina-
