paſſion qu’il auoit dans l’ame. Le Prince de Pometie & le Prince Titus auoient auſſi leurs amours cachées, Artemidore & Zenocrate auoient chacun en leur particulier leurs ſecrets, & leurs chagrins : & Celere tout ſeul iouïſſoit alors de la liberté, quoy qu’il euſt l’ame naturellement paſſionnée. Mais en l’eſtat où il eſtoit, il n’employoit toute ſa tendreſſe qu’à pleindre ſes Amis malheureux, & tout ſon eſprit qu’à chercher les voyes de les ſeruir. Il eſt vray qu’il n’eſtoit pas alors trop aiſé qu’il en imaginaſt les moyens. Mais durant que toutes ces diuerſes Perſonnes auoient des ſentimens ſi differens, on n’entendoit point parler du Prince de Numidie, qu’on auoit creu deuoir bien toſt arriuer au Camp : & Aronce ne pouuoit imaginer quelle reſolution il auoit pû prendre, car il n’y auoit point d’aparence
