qu’il euſt ſongé à ſe ietter dans Ardée ; ioint qu’Herminius le connoiſſant il eſtoit aſſuré qu’il n’y eſtoit pas. Mais enfin le ſoir eſtant venu, Amilcar retourna à la Chambre d’Aronce, où il trouua Herminius, car pour Brutus il n’eſtoit pas encore reuenu : de ſorte qu’en attendant qu’il arriuaſt, Amilcar ſe mit à raconter à Aronce tout ce qu’il auoit fait, & à luy parler en ſuite de l’enuie qu’il auoit de ſçauoir toute la vie de cét homme qui cachoit ſi bien ſa raiſon : car enfin, diſoit-il, ie ne croy point qu’il y en ait iamais eu de ſi malheureux, ny de ſi eſloigné de toutes ſortes de plaiſirs. Ie ne conçois pas meſme trop bien ce qu’il a pû faire : on dit qu’il a eſté marié fort ieune, il a des Enfans, & il ne paroiſt pas auoir vn bien proportionné à ſa naiſſance. Comment a-t-il donc pû cacher ſa raiſon à ſa propre femme tant qu’el-
