Tarquinie qui n’auoit pas encore eſſuyé ſes premieres larmes pour la mort de ſon Mary, ſentit ſi viuement celle de ſon Fils, que pour ſauuer celuy qui luy reſtoit, elle ſe reſolut à ſe dérober de Rome auec cét Enfant : & elle le fit d’autant plus toſt, qu’elle fut aduertie par Licinius, que Tarquin deuoit le luy arracher d’entre les bras en peu de iours. Si bien que cette ſage Perſonne eſtant aſſiſtée des Conſeils de ce fidelle Amy de Marcus Iunius, ſe dédtermina abſolument à ſortir d’un lieu où ſon frere regnoit auec tant d’iniuſtice. Il eſt vray qu’elle eut la conſolation d’auoir le Vertueux Licinius en ſa compagnie : car comme il eſtoit haï de Tarquin il ſe vit contraint pour ſa propre ſeureté de quitter la Patrie auſſi bien qu’elle. De ſorte que Licinius Tarquinie, & le ieune Brutus, qui ne poirtoit alors que le
