nom de Lucinius Iunius, ſortirent de Rome déguiſez, & choiſirent Metapont pour le lieu de leur retraite. Ce qui obligea Licinius à conſeiller à Tarquinie d’aller en ce lieu là, fut qu’ayant deſſein de bien eſleuer le Fils de ſon Amy, qui le luy auoit tant recommandé en mourant, il penſa qu’il n’y auoit point de Ville en toute l’Italie où il le pûſt mieux faire qu’à Metapont. Et en effet il ne ſe trompoit pas, car comme il n’y auoit pas long temps que ce fameux Philoſophe ſamien, qui a rendu ſon nom ſi illuſtre par tout le monde, eſtoit mort, la plus grande partie de ſes Diſciples y eſtoient encore, & n’y eſtoient pas en petit nombre, puis qu’ils eſtoient prés de ſix cens qui faiſoient vne profeſſion particuliere d’auoir apris de luy à honnorer la ſcienc, & à pratiquer la Vertu. Pythagore auoir meſme laiſſé vne Fille,
