iour, les villes et les chasteaux se rendoient audit Demetrius, lequel s’achemina de Poutimel, pour venir en l’armée. Il n’auoit que six compagnies de cauallerie Polonnoise, qui sont six cens hommes, quelques Cosaks de dessus la Donna et Nieper, auec quelque peu de Russes. Il enuoya incontinent licencier l’armée pour se rafraischir quelque trois ou quatre semaines, à sçauoir ceux qui ont leurs terres par-deçà Mosco, et enuoya le reste de l’armée pour coupper les viures en la ville de Mosco, et luy auec quelques deux mil hommes s’achemina à petites iournées vers ladite ville de Mosco, y depeschant iournellement des lettres, tant à la noblesse que à la commune, les asseurant de sa clemence s’ils se rendoient, et leur remonstrant que Dieu premier, et puis luy, ne faudroient à les punir de leur obstination et rebellion, s’ils y continuoient. Finalement le peuple ayant receu vne desdites lettres, s’assembla en la place deuant le chasteau. Mistisloftsqui, Choutsqui, Belsqui, et autres estant enuoyez pour appaiser le tumulte, les lettres furent nonobstant leuës publiquement et, apres s’estre entr’animez les vns et les autres, coururent au chasteau, prindrent l’Imperatrice vefue du deffunct Empereur Boris, auec son fils et sa fille prisonniers, et outre tous les Godonof, Saborof, et Villiaminof ; lesquels ne sont qu’vne maison, et pillerent tout ce qu’ils trouuerent.
Demetrius Johannes estoit à Thoula, ville esloignée de Mosco de quelque cent soixante virsts, lorsqu’il en receut les nouuelles, et depescha Knes Vacilei Galitchin, pour receuoir le serment
