de la ville : Tous les principaux vindrent au deuant dudit Demetrius iusques à Thoula. Finalement le 20. Iuin, l’Imperatrice vefue du deffunct ; et son fils Feder Borisuits, furent comme l’on tient estouffez, mais on fit courir le bruit qu’ils s’estoient empoisonnez. La fille fut constituée sous des gardes, tous les autres parens furent exilez qui deçà, qui delà. Boris Federuits deffunct, à la requeste des grands fut deterré de l’Eglise nommée Archangel, lieu de sepulture des grands Ducs et Empereurs, et fut enterré en vne autre Eglise.
Finalement Demetrius Iohannes fit son entrée le trentiesme de Iuin en la ville de Mosco, où estant arriué il depescha Mistisloftsqui, Choutsqui, Vorotinsqui, Mosalsqui, et d’autres, querir l’Imperatrice sa mere, laquelle estoit dedans vn Monastere quelques 600. virst de Mosco, Demetrius l’alla receuoir à vne virst de la ville, et apres conferences d’vn quart d’heure, en presence de tous les nobles, et de ceux de la ville, elle monta dans un carrosse, et l’Empereur Demetrius et toute la noblesse à pied à l’entour du carrosse, l’emmenerent iusques à la maison de l’Empereur, où elle demeura iusques à ce que le cloistre dans lequel fut enterrée l’Imperatrice, vefue de l’Empereur Theodore sœur de Boris, fut paracheué d’estre basty pour elle. Finalement il se fit couronner le dernier de Iuillet suiuant, qui se fit auec peu de ceremonie, sinon que tous les chemins depuis la chambre iusques à l’Eglise nostre-Dame, et de là iusques à Archangel, estoient couverts d’vne estoffe escarlatte, et dessus icelle d’vn drap d’or
