de Perse, sur lequel il marchoit, arrivé qu’il fut en ladite Eglise nostre-Dame, où le Patriarche l’attendoit auec tout le Clergé, apres prieres et autres ceremonies l’on apporta la Couronne, le Sceptre et la Pomme d’or hors du tresor, lesquels luy furent deliurez, puis en sortant de ladite Eglise pour aller à Archangel, l’on ietta le long du chemin petites pieces d’or, de la valeur d’vn demy escu, d’vn escu, et quelques-vnes de deux escus que l’on fit battre à cet effect, car il ne se fait aucune monnoye d’or en Russie, et d’Archangel il s’y en retourna en son Palais, où il y eut table ouuerte pour tous ceux qui se peurent asseoir. C’est la façon coustumiere dont ils vsent aux couronnemens. Peu de temps apres Knes, Vacilei, Choutsqui, fut accusé et conuaincu en presence de personnes choisies de tous Estats, du crime de leze-maiesté, et condamné par l’Empereur Demetrius Iohannes à auoir la teste tranchée, et ses deux freres enuoyez en exil, lequel fut amené quatre iours apres en la place publique, où ayant desia la teste sur le tronc de bois pour la luy couper, vint sa grace procurée par l’Imperatrice mere dudit Demetrius, et par un Polonnois nommé Bouchinsqui et autres, nonobstant il fut enuoyé en exil auec ses freres, où il ne demeura gueres, ç’a esté la plus grande faute que iamais l’Empereur Demetrius eut sçeu commettre, car cecy lui a procuré sa mort. En ces entrefaites il depescha Offernaci, Ioanneuits, Velaci, en ambassade en Pologne, pour accomplir comme l’on tient vne secrette promesse faicte au Palatin Sandemier, d’espouser sa fille lors qu’il plairoit
