leur consentement et agreation ; et faillit ledit Choutsqui à estre depposé : finalement le tout s’appaisa, et fut couronné le vingtiesme de Iuin.
Apres son couronnement, commencerent des secrettes et nouuelles menées contre ledit Choutsqui, en faueur (comme ie presuppose) de Knes Feder Iuanneuits Mistisloftsqui, lequel est de la principalle maison de toute la Russie, et auoit eu plusieurs voix en l’eslection, et fut escheue sur luy si le païs eust esté assemblé, lequel nonobstant refusa d’estre esleu, selon que le bruict en court, asseurant qu’il se rendroit Moine, si l’eslection tomboit sur luy : ledit Mistisloftsqui a espousé la cousine germaine de la mere de Demetrius, qui est (comme auons touché) de la maison des Nagois : tellement qu’il y a apparence que cette menée est plus de par les parens de sa femme, comme i’estime, que de son contentement. Puis fut accusé vn grand seigneur nommé Pieter Miquiteuits Sheremetof, et conuaincu par temoins en son absence estre chef de ceste menée : il est de ladite maison des Nagois, et fut enuoyé de la ville où il estoit en exil, et, comme i’ay entendu, puis apres empoisonné sur les chemins.
Fut aussi en mesme temps en vne nuict escript sur les portes de la plus part des nobles, et des estrangers, que l’Empereur Vacilei Choutsqui faisoit commandement que la commune eust à saccager lesdites maisons, veu qu’ils estoient traistres, et pour l’effectuer s’assembla ladite commune laquelle est allechée au butin par les
