luy Demetrius eust eu aucune barbe, veu qu’il ne s’en estoit apperceu durant sa vie (comme aussi n’auoit-il) mais que le corps gissant sur la place, auoit eu vne barbe espaisse comme on pouuoit veoir, combien qu’elle estoit rasée, et mesme me disoit qu’il auoit les cheueux beaucoup plus longs qu’il ne pensoit, car il l’auoit veu le iour auant sa mort ; outre ce, fus asseuré par le Secretaire dudit Demetrius, lequel est Polonnois, nommé Stanislaus Bouthinsqui, qu’il y auoit vn ieune Seigneur Russe fort aymé et fauorisé dudit Demetrius, qui luy ressembloit fort, fors qu’il auoit vn peu de barbe, lequel ne se trouuoit point et ne sçauoit-on ce qu’il estoit deuenu, selon le dire des Russes.
Puis ie fus aduerty par vn François qui estoit cuisinier du Palatin Sendemier, que l’Imperatrice femme dudit Demetrius ayant eu aduis du bruict qui couroit, se persuada entierement qu’il estoit en vie, affermant qu’elle ne le pouuoit croire autrement, et deslors se demonstroit bien plus ioyeuse qu’auparauant.
Quelque temps apres l’eslection dudit Choutsqui, se reuolterent cinq ou six principalles villes sur les frontieres de Tartarie, prindrent leurs Generaux prisonniers, tuerent et deffirent vne partie de leurs forces et garnisons, mais auant mon depart en luillet, enuoyerent en Mosco pour impetrer leur pardon, lequel ils obtindrent, s’excusans qu’on les auoit informez que l’Empereur Demetrius estoit en vie : pendant ce temps il y auoit grande diuision en Mosco, entre les nobles et les autres pour l’eslection qui auoit esté faicte de Vacilei Choutsqui sans
