pire sous Theodore Iohannes, fils de Iohannes Basilius, et frere dudit Demetrius Iohannes, enuoya ledit Demetrius auec l’Imperatrice sa mere en exil à Ouglits : l’on iugera par le discours, que ce n’estoit le faict du dit Theodore son frere, tant pour sa simplicité, que pour ce que ledit Demetrius n’estoit qu’vn enfant pour lors, aagé de quatre à cinq ans, lequel ne luy pouuoit aucunement nuire, ains que c’estoit par les menées dudit Boris Federuits. Or il est assez à presupposer, que la mere et autres des plus grands qui restoient pour lors, comme des Romaneuits, Nagois et autres, voyant le but où ledit Boris tendoit, essayerent par tous moyens à deliurer l’enfant du danger où il estoit. Or ie sçay et crois que l’on confessera qu’il n’y auoit nul autre moyen que de le changer et en supposer vn autre en sa place, et le faire nourrir secrettement, en attendant si le temps ne changeroit ou empescheroit point les desseins dudit Boris Federuits, ce qu’ils effectuerent si bien que nuls, fors ceux de la partie n’en sçeurent rien, il fut nourry secrettement, et apres la mort (comme ie tiens de l’Empereur Theodore son frere) et que ledit Boris Federuits fust eslu Empereur, il fust enuoyé en Pologne en habit de moine, pour le faire passer les confins de Russie, auec ledit Rostrigue, cy-dessus nommé, ainsi que l’on tient, où estant arriué il se mit au seruice d’un Seigneur de Pologne, nommé Visnouetsqui, gendre du Palatin Sendemier : finalement vint au seruice dudit Palatin, et se descouurit à luy, lequel l’amena à la Cour de Pologne où il reçeut quelque petit secours. Ce
