vingt-quatre ans, lorsqu’il r’entra en Russie, puis il l’y ramena, et vn chacun qui l’a voulu veoir l’a veu ; ses freres sont encores en vie, ayant des terres sous la ville de Galits. L’on cognoissoit ce Rostrigue deuant sa fuite, pour vn homme insolent, adonné à yvrongnerie, et pour laquelle insolence, fut par ledit Demetrius confiné à Ierislaf, deux cens trente virst de Mosco, où il y a vne maison de la compagnie Angloise, et celuy qui y demeuroit lors que ledit Demetrius fut assassiné, m’a affermé qu’il auoit esté asseuré par ledit Rostrigue, lors mesmes que les nouuelles vindrent que ledit Demetrius auoit esté meurtry, et Vacilei Choutsqui esleu Empereur, que ledit Demetrius estoit le vray fils de l’Empereur Iohannes Basilius, et qu’il l’auoit conduit hors de Russie. Ce qu’il attesta auec grands serments, asseurant que l’on ne pouuoit nier que luy-mesme ne fust Grisque Otrepiof, surnommé Rostrigue, c’est icy sa propre confession, et se trouueront peu de Russes, qui le croyent autrement. Quelque temps apres, Vacilei Choutsqui, eslu Empereur l’enuoya querir ; mais ie ne sçay ce qu’il est deuenu. Cecy suffira pour cette obiection.
Quant à l’obiection que font la pluspart des estrangers, qu’il estoit quelque Polonnois ou Transiluain, imposteur de par soy mesme, ou esleué à cet effect, ils le veulent prouuer, parce qu’il ne parloit pas la langue Russe si nettement qu’il conuenoit, outre ce, qu’il n’auoit les façons de faire des Russes, desquelles il se mocquoit, n’obseruoit leur Religion que par forme, et autres semblables raisons ; car pour conclu-