bonnes pommes, cerizes, peu de poires et prunes. Il s’y trouue quantité de noisettes, fraizes, et semblables fruicts : Il y a peu de pluye en esté, et par consequent point en hyuer, à Kolmengrod, Archangel, et Saint-Nicolas, comme aussi en d’autres lieux du costé de Septentrion, par l’espace d’vn mois ou six semaines en esté ; l’on y voit tousiours le soleil iour et nuit, et à la minuit on le voit deux ou trois brasses par dessus la terre. En hyuer par l’espace d’vn mois, il n’y a gueres de iour, à cause que le Soleil ne se voit point. Puis vous y auez de toute sorte de venaison et animaux qui se trouuent en France, horsmis des sangliers. Car des cerfs, biches et cheureux, il s’en trouue assez du costé d’Orient et du Midy, aux campagnes de Tartarie, et entre Casan et Astrican, il se trouue grande quantité d’Élends, dite la grande beste : par toute la Russie, les lapins y sont fort rares : les faysans, perdrix, griues, merles, cailles, et alloüettes, s’y trouuent en grande quantité, outre infini autre gibier, mais de becasses il s’y en voit fort peu. Il s’y trouue en Aoust et Septembre grand nombre de gruës : signes, oyes et carnards sauuages en hyuer. Ie n’y ai sceu voir aucunes sigognes, qu’vne seule, laquelle estoit toute noire, les bestes deuorantes sont ours blancs et noirs, desquels il y a grande quantité, des renards, desquels il y a de cinq sortes, et force loups, qui font grand dommage au bestail, à cause des grandes forests qui y sont, et outre ce, il se trouue en quelques endroits du costé de Septentrion des reins, qui sont moins gros que les cerfs, et portent de
