beaux et grans rameaux ; leur poil est grix, tirant fort sur le blanc, leurs ongles bien plus fendus que ceux des cerfs, ils seruent de nourriture, d’habitz et de cheuaux, à ceux du païs, car ils en attellent vn d’iceux dans vn tresnoir fait à propos, et vont plus viste qu’aucuns cheuaux, ils se nourrissent de ce qui se trouue soubs la neige la pluspart du temps, tous les lieures y deuiennent blancs en hyuer, et en esté sont de la mesme couleur qu’en France : Il s’y trouue en esté et hiuer des perdrix blanches, et des fauçons, tiercelets, et autres oyseaux de proye. En toute l’Europe il n’y peut auoir de meilleurs ny de plus de diuerses sortes de poissons d’eau douce qu’ils ont et en grand nombre, à sçauoir l’Estourgeon, Bellouga, Cetrina, Bieley Ribe, qui veut dire poisson blanc, vn peu plus grand qu’vn saumon, du sterlet, et de toute sorte qu’auons en France, horsmis des truites, et à bon marché, comme aussi toute autre sorte de viures : car nonobstant ceste grande famine dont parlerons cy-apres, qui depeupla presque tout le païs de bestail, i’acheptai sur les chemins à mon depart vn aigneau aussi grand qu’vn de nos moutons en France ou peu s’en faut, pour dix denins, qui sont enuiron treize sous 4. deniers, et vn poulet pour sept deniers tournois, il n’y a point de chappons entr’eux sinon entre les estrangers. L’occasion d’vn si grand marché est que chacune brebis a ordinairement deux et trois aigneaux, et lesdits aigneaux l’année suiuante se trouuent meres d’autant d’aigneaux. Quant aux bœufs et vaches ils multiplient aussi extremement, car il ne se