vn baston dont iadis les grands Ducs receuoient hommage du Tartare Distkrim, il fut aucunement blessé du coup, mais n’en mourut pas, ains quelque temps apres en vn pelerinage.
Le second fils fut Theodore Iuaneuits lequel succeda au pere. Le troisiesme fut de la derniere femme, laquelle estoit de la maison des Nagois, asçavoir Demetrius. Iohannes Vasilius ou Basilius, surnommé le Tiran, n’estant asseuré de la fidelité de ses subiects, les esprouua en diverses manieres, mais la principalle fut lors qu’il esleut au thrône imperial en sa place Zar Simeon, duquel est parlé cy-dessus, le fit couronner, luy resina tous les tiltres de l’Empire ; et se fit faire vn Palais tout contre le Chasteau, se faisant appeller Veliqui Knes Moscoffqui. Il regna 2. ans entiers, depeschans tant les affaires du païs, que de tous Ambassadeurs et autres de dehors. I’entens apres luy auoir demandé conseil, lequel valloit autant que absolu commandement. Au bout de deux ans le deposa de l’Empire et luy donna de grands biens : Apres donc la mort de son fils aisné il maria son second fils, asçavoir Theodore, à la fille de Boris Federuits, lequel estoit Gentilhomme d’assez bonne maison, que l’on appelle Deuorenne Moscoffqui, lequel peu à peu s’acquist la grace de l’Empereur Iohannes qui deceda l’an 1584. en Mars. Apres son deceds luy succeda ledit Theodore à l’Empire, Prince fort simple, lequel s’amusoit plusieurs fois à sonner les cloches ; ou la pluspart du temps en l’Eglise. Boris Federuits, estant pour lors assez aymé du peuple, et grandement fauorisé dudit
