Theodore, s’entremit aux affaires d’estat, et estant subtil et fort entendu contentoit vn chacun. Tellement qu’apres quelques murmures de deposer ledit Theodore pour sa simplicité, enfin fut Boris esleu protecteur du païs : Lequel dés-lors, comme l’on tient, commença à aspirer à la couronne, voyant que ledit Theodore n’avoit nuls enfans qu’vne fille, laquelle decedda aagée de trois ans, et à cet effect commença par bien-faicts à attirer le peuple. Il fit murer la ville de Shomolentsqui cy-dessus nommée. Il fit clorre la ville de Mosco d’vne muraille de pierres au lieu de celle de bois qui estoit auparavant : il fit bastir quelques Chasteaux entre Casan et Astrican, comme aussi sur les frontieres de Tartarie. Ainsi estant asseuré de la bonne volonté du peuple, et mesmes de la noblesse, hors-mis des plus clairsvoyans et principaux, enuoya en exil soubs quelque couleur ceux qu’il pensoit lui estre les plus contraires. Puis enuoya finallement l’Imperatrice, femme dudit deffunct Iohannes Basilius, auec son fils Demetrius Iohannes à Vglits, ville esloignée de 180. virst de Mosco. Car l’on tient que la mere et quelques autres Seigneurs preuoyant bien le but où ledit Boris tendoit, et sçachant le danger que l’enfant pourroit encourir, parce qu’il estoit desia aduenu à plusieurs Seigneurs enuoyez en exil par luy, desquels plusieurs estoient empoisonnez par les chemins, trouuerent moyen de le changer, et supposerent vn autre en sa place, apres il fit mourir encores plusieurs Seigneurs innocens. Tellement que ne se doubtant plus de personne que